A empresa quere acceder ao seu ordenador

Se unha empresa sospeita que un traballador utiliza o seu ordenador de traballo para fins particulares, pode acceder a dito ordenador para confirmar as súas sospeitas e adoptar as medidas que considere oportunas contra o empregado (unha suspensión de emprego e soldo ou un despido, por exemplo). Iso si: non pode acceder a carpetas persoais, contas privadas nin información íntima. A estes efectos, o control do ordenador debe realizarse para verificar o cumprimento das obrigas laborais e respectando o dereito á intimidade do afectado.

Para considerar que a empresa respecta o dereito á intimidade do traballador, debe cumprir o triplo xuízo de proporcionalidade que establecen os tribunais. É dicir:

• Fundamentar a súa actuación. En concreto, debe existir unha razón lexítima (probas de baixo rendemento do traballador, incumprimento de ordes empresariais…). A clave é deixar constancia de que a súa empresa necesita realizar este control informático porque doutro xeito non se pode verificar o correcto uso do ordenador.
• Actuar con proporcionalidade. Para iso, debe acceder só á información necesaria para corroborar as súas sospeitas (ao disco duro onde se garda a documentación corporativa, sen entrar en carpetas persoais).
• Non entrar en contas privadas.É dicir, se detecta o uso por parte do empregado dunha nube persoal, ou se este ten aberto o correo electrónico particular, non debe acceder sen a súa autorización.

En todo caso, a empresa debe ter informado con anterioridade aos seus traballadores de que se reserva o seu dereito a verificar o correcto funcionamento das ferramentas electrónicas que lles facilitou: ordenador de traballo, teléfono móbil… É dicir, pode controlar o uso que fan os empregados dos equipos informáticos que pon á súa disposición, sempre que previamente informe diso. Por isto, é recomendable regular o seu uso nunha normativa interna, na que conste que se poden realizar controis e se avise das consecuencias que pode ter o incumprimento.

Os nosos profesionais informaralle sobre calquera dúbida que teña respecto ao uso e control de ferramentas informáticas na empresa.