Carta de intencións

Vostede quere mercar a unidade de negocio dunha empresa dun terceiro e pídenlle que asinen unha carta de intencións. Pois ben, é frecuente que, cando se negocia a transmisión dunha liña de actividade ou a compra dunha empresa, se asine este documento.

 

Concepto

A carta de intencións ten como finalidade deixar constancia do principio de acordo que existe, entre comprador e vendedor, sobre os termos esenciais da operación que están a negociar.

 

Contido mínimo

O contido dunha carta de intencións o LOI (como tamén se denomina á carta de intencións) adoita incluír o seguinte:

• A identificación das partes e a descrición do negocio que se quere concluír.

• A estrutura da operación. É dicir, os pasos que se seguirán ata que dita operación remate. Por exemplo, a realización dunha due diligence pola parte do comprador (a análise da sociedade ou do negocio para coñecer os estados financeiros, posibles débedas, empregados, contratos, contingencias...), o prazo para realizala, etc.

• O compromiso de confidencialidade. Isto é, que o comprador non revelará información sobre a operación nin sobre a documentación que se lle entregue.

• A exclusividade. Isto é, que o vendedor reserva ao comprador a exclusividade da operación durante o prazo que se pacte.

 

Consellos

Ás veces, poden incluírse pactos que dean a entender que hai un acordo sobre o obxecto e o prezo ou que a venda terá lugar se se cumpre unha determinada condición (por exemplo, se o vendedor entrega unha documentación). Neses casos, o vendedor poderá esixirlle que cumpra e, se non o fai, poderá reclamarlle unha indemnización. Para evitalo, faga o seguinte:

• Asegúrese de que o documento só lle compromete a estudar a posibilidade de realizar a compra.

• Estableza un prazo para as negociacións e pacte que as dúas partes poidan finalizalas anticipadamente cun simple preaviso, sen alegar ningunha causa nin pagar ningunha indemnización.

• Comprobe que non existe a obriga de compra, nin sequera se se cumpren unhas condicións (como a indicada con anterioridade).

 

Os nosos profesionais asesorarano e axudarano en todo o proceso de compra dunha rama de actividade, incluídos os posibles pasos previos, como a carta de intencións.