Sentenzas de interese no ámbito laboral

Requisitos do contrato de relevo

O Tribunal Supremo [TS 21-10-2025] reiterou os requisitos para a validez do contrato de relevo nas xubilacións parciais. A base de cotización do relevista debe ser igual ou superior ao 65% da media das bases de cotización dos últimos seis meses do traballador que accede á xubilación parcial, sen que este porcentaxe dependa da xornada (completa ou parcial) que realice o relevista.

O debate xurdía sobre se ese 65% debía axustarse á xornada (por exemplo, se o relevista só cubría o 50% da xornada do xubilado), pero quedou claro que non é así:

• O porcentaxe aplícase sobre a base de cotización do xubilado traballando a xornada completa e non se reduce segundo a xornada do relevista.

• Este criterio garante que, á marxe da xornada do relevista ou o salario que perciba, a súa base mínima para cotizar non se reduza.

 

Exclusión dos maiores de 55

A Audiencia Nacional [AN 15-10-2025] analizou se nun despedimento colectivo pode excluírse da afectación aos traballadores maiores de 55 anos sen que iso supoña discriminación por idade. No caso concreto:

• O despedimento colectivo levouse a cabo por causas produtivas e organizativas e o acordo final incluíu varias medidas, como a exclusión do persoal maior de 55 anos ou idemnizacións reforzadas para colectivos vulnerables.

• Por iso, un sindicato impugnou o despedimento alegando, entre outros motivos, discriminación pola exclusión das persoas maiores de 55 anos.

Pois ben, a Audiencia conclúe que non hai discriminación: unha medida tomada para protexer a este colectivo, especialmente vulnerable e con maior dificultade para atopar emprego, considérase proporcional e legítima. Ademais, a Audiencia tamén valida as indemnizacións reforzadas.

 

A súa parella está na cadea

Unha traballadora que tivo un fillo mentres a súa parella (o pai do bebé) estaba na prisión solicitou a prestación por nacemento e coidado do menor. E, aínda que o INSS recoñeceulle, non aceptou que "sumase" as semanas que lle corresponderían por familia monoparental. Por iso, a traballadora interpuxo unha demanda alegando discriminación, pero os tribunais [TC 17-11-2025] non lle deron a razón:

• A muller pediu aplicar a doutrina sobre familias monoparentais, segundo a cal debe engadirse ao permiso da nai o do outro proxenitor.

• Con todo, o Tribunal rexeitou a súa reclamación: a súa é unha familia biparental porque hai dous proxenitores, e a falta de desfrute do permiso por parte do pai por estar na cadea non converte o caso en monoparentalidade. Ademais, a lei configura o dereito como individual e condicionado a requisitos de alta e cotización persoais.