Quero pagar o aluguer

Ás veces, tras un cambio de propietario do inmoble, o arrendatario pode atopar dificultades para pagar o aluguer, xa sexa porque o novo arrendador rexeita o cobro ou porque non está claro a quen debe aboar (por exemplo, en casos de herencia aínda sen resolver).

Nestas situacións, o medo do arrendatario xurde porque, ante o impago, o arrendador pode presentar contra el unha demanda de desafiuzamento e verse obrigado a deixar o inmoble.

Pois ben, para estes casos existe a vía da consignación, isto é, un mecanismo que permite ao arrendatario cumprir co pago do aluguer cando o arrendador non quere ou non pode cobralo. Aínda que a consignación pode facerse nun xulgado ou ante notario, a consignación xudicial é máis conveniente porque non implica ningún custo para o arrendatario (non é necesario nin avogado nin procurador).

Non obstante, antes de acudir ao xulgado, a lei require que ofreza o pago ao arrendador, o cal pode facerse a través dun medio fehaciente (por exemplo, un burofax). Se o arrendador rexeita o pago ou non di nada, poderá presentarse un escrito no xulgado onde se expoñan os feitos e se solicite a apertura dun "expediente de xurisdición voluntaria".

Unha vez iniciado este expediente, o xulgado comunicará ao arrendador que a renda está consignada e que ten dez días para aceptala e retirala. Se este se opón ou non responde, o xulgado requiriralle a vostede para que decida se a retira ou a mantén. O consello é comunicar ao xulgado que a manteña, así quedará clara a súa vontade de pago. Tras dito trámite, o xulgado citaralles e resolverá se a consignación está ben feita. En caso afirmativo, vostede quedará libre de calquera responsabilidade fronte ao arrendador.

 

Os nosos profesionais asesorarano e axudarano a seguir os pasos correspondentes no caso de que vostede sexa arrendatario e atópese nunha situación semellante.