Embargo de participacións sociais

Un banco demandou a un socio da súa empresa para reclamarlle unha débeda relacionada cun préstamo persoal. O socio foi condenado e, dado que non pagou a débeda e os seus únicos bens eran as participacións sociais na SL, o xulgado acordou o seu embargo.

Por este motivo, o administrador recibiu do xulgado unha "diligencia de embargo", na que lle comunica a identidade do embargante e as participacións embargadas. Pois ben, vexa que debe facer un administrador para cumprir con esta diligencia.

En primeiro lugar, debe anotar o embargo das participacións no libro rexistro de socios da sociedade; no apartado correspondente ao socio afectado, deberá indicar o número das participacións que foron embargadas, así como os datos do embargo (xulgado de procedencia, número de diligencia e data). Ademais, deberá legalizar o libro —é dicir, presentalo no Rexistro Mercantil— de forma telemática.

Unha vez realizada a anotación, deberá preparar un certificado asinado polo administrador no que conste o nome do socio e as participacións afectadas polo embargo. Debe indicarse tamén se existen pactos que limiten a libre transmisión das participacións embargadas ou calquera outra cláusula estatutaria ou contractual que as afecte.

Tras o anterior, poderá contestar por escrito á diligencia de embargo adxuntando unha copia do libro rexistro de socios e a certificación. Debe indicarse nesta resposta ao xulgado que o libro rexistro legalizarase no Rexistro Mercantil no prazo legalmente previsto.

Por último, saiba que este embargo tamén ten repercusións para os demais socios:

• O administrador debe remitir unha copia da notificación a todos os socios.

• Ademais, se o embargo continúa adiante e as participacións saen a subasta, os socios terán un dereito preferente para adquirilas (pagando o importe polo que se adxudiquen na subasta). O prazo para exercitalo é dun mes dende que o xulgado comunique a adxudicación.

• É aconsellábel que os estatutos da súa sociedade preveñan este dereito de adquisición preferente tamén en favor da propia sociedade.

 

Os nosos profesionais axudarano e asesorarano en todas aquelas cuestións legais relacionadas co seu cargo de administrador.