Quero vender as miñas participacións

Vostede é socio dunha SL, e un dos outros socios plantexou ao resto a súa intención de transmitir ao seu fillo as súas participacións sociais. Pois ben, cando un socio quere transmitir as súas participacións sociais, o primeiro que hai que facer é acudir aos estatutos sociais para comprobar se existen límites ou restricións a esa transmisión.

Situacións

Pois ben, pode atoparse con dúas situacións:

• Non hai previsión estatutaria. Se os socios non acordaron nada nos estatutos, a lei establece que a transmisión das participacións inter vivos (a que se realiza en vida do transmitente) será libre cando se faga a favor de persoas concretas: o cónxuxe, os ascendentes ou descendentes do transmitente, ou ben outros socios.

• Hai previsión estatutaria. Se os socios incluíron nos estatutos unha cláusula para regular o chamado dereito de adquisición preferente , isto significa que os socios –e incluso a propia sociedade– terán prioridade, por exemplo, fronte ao fillo do outro socio, na compra das participacións.

Maior restrición

Se os socios queren ser máis restrictivos, poden incluír nos estatutos unha prohibición de venda das participacións (tanto ao cónxuxe, ascendentes, descendentes ou outros socios como a terceiros alleos á sociedade), pero só en dous supostos concretos:

• Absoluta ou indefinida. É posible prohibir totalmente a transmisión de participacións por actos inter vivos (exclúense herdanzas ou transmisións forzosas –por exemplo, por un embargo–) se se lles concede aos socios o dereito a poderen separarse da sociedade en calquera momento.

• Temporal. Admítese a prohibición transitoria da transmisión das participacións durante un período de tempo non superior a cinco anos, a contar desde a constitución da sociedade ou, cando sexan participacións procedentes dunha ampliación de capital, desde o outorgamento da escritura pública da súa execución.

Requisitos

Para incluír estas prohibicións nos estatutos, a lei require un acordo unánime dos socios, xa que iso implica unha modificación dos estatutos sociais que afecta aos dereitos individuais de cada un dos socios.

 

Os nosos profesionais asesorarano e resolverán todas aquelas dúbidas que lle xurdan sobre a transmisión das participacións sociais da súa empresa.